شعر ترکی/ مجیدکرم زاده(سالک)

او قارا گوزلروین سورمه سینه قوربان اولوم

باخیشینلان توکولن عشوسینه قوربانام اولوم

قاداسین آلدیغیم او گوزلریلن بیر منه باخ

منی دیندیر او شیرین سوزلرینه قوربان اولوم

قاش قاباغ توکمه منه، گوزلری سوزدورمه منه

منه قاش گوز آتان او گوزلرینه قوربان اولوم

قدی قامتدی قیامت منی حیران ائلیوب

اوجا بویلی گوزلیم، قامتینه قوربان اولوم

اچگینان قول قانادو آل منی آغوشیوه سن

منی آغوشه چکن اللرینه قوربان اولوم

گجه گوندوز یولوی گوزلییرم سن گلسن

گلن او یولاروین دونگه سینه قوربان اولوم

یازیرام وصفیوه من هرنقدر ناز ائدیسن

نازینه مشترییم ناز ائدنه قوربان اولوم